સ્વામિનારાયણ કક્કો

સ્વામિનારાયણ કક્કો : જો આ કક્કો શીખી જશો તો જીવનમાં ક્યાય પાછા નહિ પડવાનો વારો નહિ આવે
ક – કંચન, કામિની ને કાયા, એ ત્રણેય સંસારની માયા.
►ખ – ખાતા, ખરચતાં અને ખીજાતા, શક્તિનો વિચાર કરજો.
► ગ – ગદ્ધો, ગમાર અને ગરજુ, એ ત્રણે સરખા સમજુ.
► ઘ – ઘર, ઘરેણાં ને ઘરવાળી, એમાં જિંદગી આખી બાળી.
► ચ – ચોરી ચુગલી અને ચાડી, એ ત્રણેય દુર્ગતિની ખાડી.
► છ – છોરુંની ભૂલ છાવરશો તો, લોહીના આસું રડશો.
► જ – જાગ્યો તેનો જશ ગવાશે, ઊંઘ આવી તેને ભવ ભટકાશે.
► ઝ – ઝાઝું દ્રવ્ય સત્તા ને જુવાની, એ ફેલને માર્ગે લઈ જવાની.
► ટ – ટોળ, ટપ્પા ને ટીખળ કરે, એ પુણ્ય બાળે ને પાપ ભરે.
► ઠ – ઠાઠ, ઠઠારો ને ઠકુરાઈ, એમાં અભિમાન ને અક્કડાઈ.
► ડ – ડાહ્યો જગતમાં એને ગણ્યો, જે સ્વામિનારાયણ નામ ભણ્યો.
► ઢ – ઢોલ નગારાં એમ ઉચરે છે, ભજન કરો ભાઈ કાળ ફરે છે.
► ત – તૃષ્ણાથી તરસતો તાવ,સંતોષની ગોળીથી જાય.
► થ – થોડું કરો પણ સતત કરો, ભક્તિ માર્ગે ગતિ કરો.
► દ – દમી, દયાળુ ને દાતા, તે પામે સુખ ને શાતા.
► ધ – ધર્મ ધ્યાનમાં મગ્ન રહે, એ અક્ષરધામની પદવી લે.
► ન – નિયમ , ન્યાય ને નીતિ જેને, મળે સુખની ચાવી તેને.
► પ –પંચવિષયને તજો તમામ, હરિ ભજી પામો અક્ષરધામ.
► ફ – ફરી ફરીને ફરવું નથી, ભવસાગર માં પડવું નથી.
► બ – બાવળ, બોરડી ને બાયડી, એ શસ્ત્ર વગરની શાયડી.
► ભ –ભગવાન મૂકી ભોગમાં રમે, તે તો લખ ચોરાશી ભમે.
► મ – મોહ, મમતા ને માયા, એમાં રમે નહિ તે ડાહ્યા.
► ય – યમ, નિયમને ઉર ધરજો, સદાય પરમ સુખને વરજો .
► ર – રહેવું ઘરમાં જેમ મહેમાન, નહીં આસક્તિ મમતા માન.
► લ – લક્ષ્મી, લાડી ને લોભ, એ પરભવ મુકાવે પોક.
► વ – વિનય, વિવેક, વૈરાગ્ય ધરો, બ્રહ્મ સ્વરૂપમાં પ્રીત કરો.
► શ –સાધુગુણ શણગાર ધરે, તેને અક્ષરધામ વરે.
► સ – સંસાર સાગર ખારો છે, સત્સંગ મીઠો આરો છે.
► ષ – ષડક્ષરો છે સ્વામિનારાયણ, મહામંત્ર છે ભવ તારાયણ.
► હ – હરિને ભજતાં પાપ ટળે, અંતે અક્ષરધામ મળે.
► ક્ષ – ક્ષમા શસ્ત્ર જે ધારણ કરે, એને ઇન્દ્રિય વિજય વરે.
► જ્ઞ– જ્ઞાન એ જ જે વર્તન હોય, અક્ષર બ્રહ્મનું સ્વરૂપ સોય.